Best Online News From Nepal

जग्गा विवाद टुंगिएसँगै यसरी अघि बढ्दैछ कालीगण्डकी प्रशारण आयोजना

पर्वत जिल्लामा निर्माणाधीन नेपाल विद्युत् प्राधिकरण (कालीगण्डकी प्रसारण करिडोर आयोजना) को सवस्टेसनका लागि अधिग्रहण गरिएको जग्गाका जग्गाधनीलाई मुआब्जा वितरण गरिएको छ । प्रमुख जिल्ला अधिकारी नेतृत्वको जिल्ला मुआब्जा निर्धारण समितिको २०७२ पुस २९ गते बसेको बैठकले अधिकरण गर्ने जग्गामध्ये सडकसँग जोडिएको जग्गाको प्रतिरोपनी १० लाख रुपैँया र बाँकी जग्गाको आठ लाख रुपैँयाका दरले जग्गाधनीलाई मुआब्जा उपलब्ध गराउने निर्णयअनुसार नै रकम वितरण गरिएको हो । गत पुसमा जग्गाधनीलाई जग्गाको मुआब्जा रकमसँगै जग्गामा लगाइएको बाली तथा भौतिक संरचनाको क्षतिपूर्ति रकम थप गर्ने सहमतिअनुसार मुआब्जा वितरण गरिएको हो । प्रमुख जिल्ला अधिकारी झङ्कनाथ ढकालको पहलमा लामो समयदेखि रोकिएको जग्गाको विवाद टुङ्गिएको थियो ।

आयोजनाले स्थानीय ८४ जना जग्गाधनीको १ सय ५४ रोपनी जग्गा लिने निर्णय भएको थियो । उक्त जग्गाका धनीलाई वितरण गर्न १२ करोड ८० लाख रुपैँया जिल्ला प्रशासन कार्यालयमा प्राप्त भएको थियो । जसमध्ये अहिलेसम्म ७८ जना जग्गाधनीलाई ११ करोड ४० लाख ४२ हजार ९ सय ६७ रुपैँया वितरण गरिएको प्रमुख जिल्ला अधिकारी झङ्कनाथ ढकालले जानकारी दिए । छ जना जग्गाधनीलाई मुआब्जा वितरण गर्न बाँकी रहेको उनले बताए । उनीहरु कार्यालयमा रकम लिनका लागि नआएको उनले बताए ।

कुश्मा नगरपालिका, जिल्ला मालपोत कार्यालय, जिल्ला विकास समितिले तोकेको मूल्यलाई समायोजन गरी मुआब्जा निर्धारण समितिले मुआब्जा रकम निर्धारण गरे पनि जग्गाधनीले मुआब्जा बढाउन दबाब दिँदै आएका थिए । जग्गाधनीले अटेर गर्दा आयोजनाको काम नै प्रभावित भएको थियो । मुआब्जामा चित्त नबुझेको भन्दै जग्गाधनीले सर्वोच्च अदालतदेखि अख्तियार दुरुपयोग अनुसन्धान आयोगसम्म गुहारेका थिए । “जग्गाको मुआब्जा विवादले सबैभन्दा बढी तनाव भएको थियो, अब त्यो विवाद मिलाएर मुआब्जासमेत वितरण गरेका छौँ” प्रजिअ ढकालले भने – “जग्गामा लगाएको बाली र भौतिक संरचनाको क्षतिपूर्ति समेत जग्गाधनीले पाएका छन् ।

ढकालले नेपाल सरकार र एसियाली विकास बैंकबीच भएको सम्झौतामा अधिकरण गर्ने जग्गा र त्यहाँ रहेका भौतिक संरचनाको छुट्टै क्षतिपूर्ति दिने व्यवस्थाले विवाद मिलाएको जानकारी दिए । धौलागिरिका पर्वत, बागलुङ, म्याग्दीमा धमाधम विद्युत् आयोजना निर्माण भइरहेको अवस्थामा कालीगण्डकी प्रसारण करिडोर आयोजनाले कुश्मा नगरपालिका–४ खुर्कोटमा २२०÷१३२÷३३ केभिको सवस्टेसन निर्माणको तयारीमा छ ।

जग्गाको विवाद मिलेर मुआब्जा वितरण गरिएसँगै आयोजनाका काम अब धमाधम काम अगाडि बढ्ने आयोजनाका लेखापाल गोविन्दप्रसाद शर्माले बताए

Leave a Reply

Your email address will not be published. Required fields are marked *