Best Online News From Nepal

कार्यालय सहयोगीको तलब २५ हजार नपुर्याए कर्मचारी संगठनले आन्दोलन गर्ने

नेकपा (एमाले) निकट नेपाल निजामती कर्मचारी सङ्गठनले आधारभूत तह (कार्यालय सहयोगी) को तलब २५ हजार नपुर्याइए आन्दोलन गर्ने बताएका छन् । बुधबार अर्थमन्त्री विष्णु पौडेललाई भेटेर उनीहरुले तलव बढाउन माग गरेका हुन् । अन्य ट्रेड युनियन पनि तलब वृद्धिका लागि आ–आफ्नो ढङ्गले जुटेका छन् । बुधबार बिहान र बेलुकी गरी दुईपटक कर्मचारीहरूले अर्थमन्त्रीलाई भेटेका थिए ।

तलब वृद्धिको विषयले आधिकारिक ट्रेड युनियनको चुनावी अभियान ओझेलमा परेको संगठनको भनाइ छ । सरकारी जागिरकै भरमा कर्मचारी बाँच्न सक्ने अवस्था नभएकाले तलब वृद्धिको विषयले सबै कर्मचारीको भावना समेट्ने उनीहरुको तर्क छ । न्यून तलबकै कारण मुलुकमा सुशासन कायम हुन नसकेको तर्क गर्दै कर्मचारी ट्रेड युनियनहरू कर्मचारीको तलब वृद्धिमा सरकारले कञ्जुस्याई गर्न नहुने बताउँदै आएका छन् । तलब वृद्धि र महँगी नियन्त्रणको विषयमा सरकार संवेदनशील नभए निजामती प्रशासन झनै कमजोर र भ्रष्टाचारतर्फ उन्मुख हुने उनीहरुको भनाइ छ ।

यता, सरकार बजेट निर्माणमा जुटेको र आम्दानी अनुसार खर्च गर्ने गरी १० देखि २० प्रतिशतसम्म कर्मचारीको तलब वृद्धि गर्ने तयारीमा रहेको अर्थ मन्त्रालय स्रोतको भनाइ छ । भेटमा अर्थमन्त्री पौडेलले आगामी बजेट कर्मचारीलाई प्रोत्साहन गर्ने खालको आउने बताएका थिए । ‘तपाईँहरू ढुक्क हुनुहोस्, आगामी बजेट कर्मचारीलाई अभिप्रेरित गर्ने गरी आउँछ’– अर्थमन्त्री पौडेलले भने ।

सरकारले आधिकारिक ट्रेड युनियनको चुनाव आगामी जेठ १९ गते गर्ने घोषणा गरेको छ भने बजेट जेठ १५ गते सार्वजनिक हुन्छ । निजामती सेवामा करिब ८० हजार कर्मचारी कार्यरत छन् । हरेक कर्मचारीलाई दश हजार रुपियाँका दरले तलब वृद्धि गर्दा बहालवाला कर्मचारीका लागि मात्र वार्षिक नौ अर्ब ६० करोड रुपियाँ बराबरको आर्थिक दायित्व बढ्छ ।

One Comment

Leave a Reply

Your email address will not be published. Required fields are marked *