Best Online News From Nepal

ओटीसी कारोबार बढेसँगै यसरी बढ्यो नेप्सेको आम्दानी

नेपाल स्टक एक्चेन्ज (नेप्से)मा सूचीकृत नभएका कम्पनीहरूले कारोबार गर्ने ओभर दी काउन्टर (ओटीसी बजार) मा सेयर खरिद बिक्री गर्ने कम्पनीको संख्या बढ्दै गएको छ । एक महिनाको अवधिमा बजारमा सात कम्पनीले सेयर कारोबार गरिसकेको छ भने अन्य कम्पनी पनि कारोबारका लागि पाइपलाइनमा रहेका छन् । कम्पनी रजिस्ट्रार कार्यालयले नेप्सेमा सूचीकृत नभएका पब्लिक कम्पनीहरूले सेयर कारोबार अनिवार्य रूपमा ओटीसी बजारमार्फत नै गर्नुपर्ने निर्देशन दिएपछि कम्पनीहरूलाई दबाब परेको हो ।

ओटीसी बजारमा हालसम्म मारुती सिमेन्ट कम्पनी, नेपाल हाइड्रो डेभलभर कम्पनी, काठमाडौं फरेस्टी कलेज, ग्रोमोर मर्चेन्ट बैंकर, हुलास वायर इन्डस्ट्रिज, युनाइटेड मोदी हाइड्रोपावर र सियान सिड सर्भिस कम्पनीको कारोबार भएको छ । कारोबार भएका उक्त कम्पनीबाट नेपाल स्टक एक्सचेन्जले कमिसन र करसहित २३ लाख रुपैयाँ आम्दानी गरिसकेको छ । त्यस्तै, बजारमा कारोबारका लागि रादी विद्युत् कम्पनी तथा रहिराङ हाइड्रोपावर कम्पनीले आवश्यक प्रक्रिया अगाडि बढाइरहेका छन् ।

ओटीसी बजारमा मारुती सिमेन्ट कम्पनीको सबैभन्दा पहिला कारोबार भएको थियो । उक्त कम्पनीको ६ लाख ९३ हजार २ सय कित्ता सेयर खरिद बिक्री भएको थियो । त्यस्तै, नेपाल हाइड्रो डेभलभर कम्पनीको ६० हजार कित्ता सेयर खरिद बिक्री भएको थियो भने काठमाडौं फरेस्टी कलेज पब्लिक कम्पनीको १ सय ८४ कित्ता सेयर खरिद भएको थियो । ग्रोमोर मर्चेन्ट बैंकरको ७४ हजार कित्ता, हुलास वायर इन्डस्ट्रिजको १ हजार कित्ता, युनाइटेड मोदी हाइड्रोपावरको ६ लाख ५१ हजार ७ सय १३ कित्ता, सियान सिड सर्भिसको १० हजार कित्ता सेयर खरिद बिक्री भएको छ ।

Leave a Reply

Your email address will not be published. Required fields are marked *